ಮನಸಾಯನ ಮಧುರ ಮನಸ್ಸಿನ ಅಕ್ಷರಗಳ ಪಯಣ

ನನ್ನ ಮನದ ಮಿಡಿತಗಳಿಗೆ ಭಾಷೆಯ ಬಣ್ಣ ಬಳೆದು,

ಪ್ರೀತಿಯ ಮಕರಂದವ ಬೆರೆಸಿರೆ,

ಅರಳಿದ ಪ್ರೇಮ ಸುಮವೇ-

ಈ ಮನಸಾಯನ;

ನಿನ್ನ ಸವಿನೆನಪಿನ ನಕ್ಷತ್ರಗಳ, 

ಕವಿತೆಗಳ ರೇಖೆಯಿಂ ಜೋಡಿಸಿರೆ,

ಮೂಡುವ ರಂಗೋಲಿಯ ಚಿತ್ತಾರವೇ-

ಈ ಮನಸಾಯನ;

ನಿನ್ನ ಹೃದಯದ ತಾಳಕೆ,

ಎನ್ನ ಭಾವದ ಮೇಳಕೆ,

ಮಧುರ ಪ್ರೇಮಗಾನವೇ-

ಈ ಮನಸಾಯನ;

ನನ್ನ ಮನದ ಮೋಡವು ನಿನ್ನೊಲವಿಗೆ ಕರಗಲು,

ಸುರಿವ ಪದಗಳ ಸೋನೆಯೇ-

ಈ ಮನಸಾಯನ;

ನಿನ್ನ ಸಾಂಗ್ಯಾತದ ತವಕದಲಿ,

ಕುಣಿವ ಬಯಕೆಗಳ,

ಕನಸಿನ ಕಾಗುಣಿತವೇ-

ಈ ಮನಸಾಯನ;

ನನ್ನೆದೆಯ ಭಾವಲೋಕದಿ,
ನಿನ್ನ ನಯನದ ಬೆಳಕಲಿ,

ಉದಯಿಸಿದ ಕವನಗಳ, 

ಪ್ರೇಮ ಪಲ್ಲಕಿಯ ಮೆರೆವಣಿಗೆಯೇ-

ಈ ಮನಸಾಯನ;

ನನ್ನದೆಗೂಡಿನ ಮಿಡಿತದಲಿ,
ಮನದಾಳದ ತುಡಿತದಲಿ,
ಜನಿಸಿದ ನಿನ್ನುಸಿರಿನ ನಿರೀಕ್ಷೆಯ ಮಂದಹಾಸವೇ-

ಈ ಮನಸಾಯನ;

ಹೃದಯದಿ ಪ್ರೀತಿಯು ಪಲ್ಲವಿಸಿದವಳು,
ಕನಸಿಗೆ ರೂಪವ ಕೊಟ್ಟವಳು,
ಸವಿನೆನಪಾಗಿಯೇ ಉಳಿದವಳು,
ಅವಳಿಗೀ ಕಾವ್ಯಸಮರ್ಪಣೆಯು!!!