ಭ್ರಮೆ....

ಪ್ರೀತಿ ಕಾವ್ಯದೊಳಷ್ಟೇ ಸುಂದರ, 
ಮಾತಿನೊಳಷ್ಟೇ ಮಲ್ಲಿಗೆ:

ನಿಜದೊಳು ಹುಸಿಯಲಂಕಾರ, 
ನಂಬಿಕೆಯ ಭ್ರಮೆ, ಸುಳ್ಳಿನ ಅಮಲು...

ಈ ಬದುಕು ನಿನಗಾಗಿ ...

ನನ್ನ ಏಕಾಂತವೆಲ್ಲ ನಿನ್ನ ನೆನಪಿಗೆ ಸ್ವಂತ 

ನಿನ್ನ ನೆನೆಯುದೆ ಬದುಕಾಗಿರಲು
ಬದುಕೇ ನಿನಗೆ ಸ್ವಂತ;

ಸೋತ ಕಣ್ಣೀರಿನ ಹನಿಗಳಲಿ 

ನಿನ್ನ ಪ್ರತಿಬಿಂಬದ ಹುಡುಕಾಟವೊಂದೆ 
ನನಗುಳಿದ ಸಂಭ್ರಮ;

ಮುಗಿಯದಷ್ಟು ಮೋಹ ...

ಅಕ್ಷರದೊಳು ಮರೆಯಾದ ಆಸೆಗಳೆಷ್ಟೋ,

ಕವಿತೆಯೊಳು ಕಮರಿದ ಪ್ರೀತಿಗಳೆಷ್ಟೋ,

ಮಂಕು ಮನಸಿನ ಲೆಕ್ಕಾಚಾರದ

ಮೋಹ ಮುಗಿಯದಷ್ಟು !!

ಬರೆಯದ ಪತ್ರ !

ತಲುಪದೆಯೆ ನಿನ್ನ ಉಳಿದ ಪತ್ರವಿಂದು

ನನ್ನ ನಯನವ ಕಾಡಿದೆ..

ಸಮಯದ ಸೋಲಿಗೆ ಹೆದರೊ

ಹೃದಯವು ಕಮರಿದ ಸುಮವಾಗಿದೆ;

ಗೆಳತಿ ...

ಅಂಬರನ ಅಂಗಳದ 
ಚಂದಿರನ ಹಾಲ್ನಗೆಯ,
ನಿನ್ನ ಮಲ್ಲಿಗೆ ಮೊಗದ 
ಮೆರುಗು ಮಂಕಾಗಿಸಿದೆ;

ಈ ಹೃದಯವು ನಿನ್ನ ಸವಿ ನೆನಪಿನ 
ಸ್ವರದಲ್ಲಿ ಮಿಡಿಯುತಿಹುದು;
ನಿನ್ನ ಮಧುರ ಮೋಹದ 
ಒಲವ ಗೀತೆಯ ಹಾಡುತಿಹುದು;

ನನ್ನ ನಾ ಕವಿ ಎನ್ನಲೇ ?

ನಿನ್ನ ನೆನಪಲ್ಲಿ ಬರೆದ ಪದಗಳೆಲ್ಲ ಕವಿತೆಯಾದರೆ
ನನ್ನ ನಾ ಕವಿ ಎನ್ನಲೇ ?
ನಿನ್ನ ಸೇರುವ ಬಯಕೆಯೊಂದೆ ನನ್ನ ಮನವಾಳುತಿರಲು
ನನ್ನ ನಾ ಪ್ರೇಮಿ ಎನ್ನಲೇ ?

ನವೋತ್ಸಾಹ

ಹೊಸ ಅಂತ್ಯದ ಆರಂಭ,
ನವ ನಿತ್ಯದ ಶುಭಾರಂಭ,
ಸವಿ ನೆನಪುಗಳ ಸಮಾರಂಭ!!

ದಿನವುರುಳಿ ಜಗವರಳಿ
ಮನದ ಕತ್ತೆಲೆಯಗಲಿ;
ನವ ವರುಷದ ನವ ಹರುಷದಿ
ನವೋತ್ಸಾಹ ಚಿಮ್ಮಲಿ!
ಹೊಸ ಬೆಳಗನು ಬೆಳಗಲಿ...

ಮೊದಲ ಸಂಬಳ ...

ನನ್ನ.... 
ಕನಸಿನ ಹಕ್ಕಿಯ ತೊದಲ ಗಾನ
ನಲುಮೆಯ ಕೂಸಿಗೆ ಮೊದಲ ಚುಂಬನ
ರಾಶಿ ರಾಶಿ ಬಯಕೆಯ ಬಾಳಿಗೆ
ವಿಶ್ವಾಸದ ಆತ್ಮೀಯ ಆಲಿಂಗನ
ಬರುವ ನಾಳೆಗಳಿಗೆ ಜೀವನ ಸಂಭ್ರಮ

ಸವೆಯದ ಸೊಗದ ಮಾಲಿಕ ನೀ,
ಅಡಗಿಯೇ ನಿನ್ನ ನಯನದೊಳು  
ನನ್ನವರ ಹರುಷದ ಛಾಯೆ
ಪ್ರೇಯಸಿಯ ಪ್ರೀತಿಯ ಚೆಲುವು
ಗೆಳೆಯರ ನಲುಮೆಯ ನಗು
ಮಾಯಗಾರ ನಿನಗೆ,ನನ್ನ ನಮನ....   !!!