ಮಂಜಿನ ಹನಿ...

ದುಮ್ಮಿಕ್ಕುವ ಜಲಪಾತದಿ ನೀ ಮುತ್ತಿನ ಹನಿ.
ಆಗುವೆಯಾ ನನ್ನೊಲವಿನೆಲೆಯ ಮಂಜಿನ ಹನಿ?

ನಿನ್ನ ಕಣ್ಣು........

ನಿನ್ನ ಕಣ್ಣ ಸೆರಮನೆಯು, ಬಂಧಿಯಾಗಿಸಿದೆ ನನ್ನ ಈ ಜನ್ಮಕ್ಕೆ.
ಬಿಡುಗಡೆಯ ಆಸೆಯು ನನಗೇಕೆ? ಆಗಿರಲು ನಿನ್ನ ಕಣ್ಣು ಸ್ವರ್ಗದ ಶಾಖೆ.

ನಿನ್ನಾಗಮನವೆ ನನಗೆ ಅಮೃತ..

ನನ್ನ ಮನದ ಮೌನವು ಗುನುಗಿದೆ ನಿನ್ನೊಲವಿನಿಂಚರವ,

ಕೇಳೆಯಾ ನೀ ಗೆಳತಿ?

ಈ  ಕನಸಿನ ಬಣ್ಣವು ಕರಗಿದೆ ನಿನ್ನ ನಯನದ ಬೆಳಕಿಲ್ಲದೆ,

ನನ್ನೆದೆಯುಸಿರು ತಪಿಸಿದೆ ನಿನ್ನುಸಿರಿನ ಮಿಲನದಂಬಲದಲಿ!!!

ಈ ನೋವ ಸಾಗರವ ನಾನೀಜಬಲ್ಲೆ, ನಿನ್ನ ನೆನಪಿನ ಬಲದಲಿ,

ಈ ಉಲ್ಲಾಸದಮೃತವು ವಿಷವಾಗಿದೆ, ನೀನಿಲ್ಲದೆ!! 

ಪ್ರೀತಿಸು ಗೆಳತಿ ಒಂದು ಕ್ಷಣ

ನೀ ಜಗವ ಮರೆಸುವ ಮತ್ತು,
ಕನಸಲ್ಲೂ ಕನವರಿಸುವೆ ನಿನ್ನ ಹೆಸರು, ನನ್ನ ನಾ ಮರೆತು.
ಮೀಸಲು ನಿನ್ನೊಲವಿಗೆ ನನ್ನ ಪ್ರತಿ ಹುಟ್ಟು.
ನಗುವೆ ನಾ ಸಾವಲ್ಲು ಸಿಗಲು ನಿನ್ನ ಸವಿಮುತ್ತು .
ನನ್ನ ಮನದಲ್ಲಿ ನಿನ್ನದೇ ನೆನಪು ಪ್ರತಿ ಹೊತ್ತು .
ಪ್ರೀತಿಸು ಒಂದು ಕ್ಷಣ, ಬೆರಗಾಗುವ ಹಾಗೆ ಈ ಜಗತ್ತು.

ನಿನ್ನೊಲವಿನ ಬೆಳಕು...

ನಿನ್ನೊಲವೇ ನನ್ನೀ ಬಾಳಿನ ಬೆಳಕು.
ನಿನ್ನ ನಗೆಯಂಚಿನ ಮಿಂಚು
ನನ್ನೆದೆಯ ಕಾರ್ಮೋಡವ ಸರಿಸಿ,
ಪ್ರೀತಿಯ ಮಳೆ ಸುರಿಸಿ,
ಕನಸುಗಳ ಹೊಳೆ ಹರಿಸಲು,
ಈ ಬಾಳು ಹಸಿರಾಯಿತು,
ನನ್ನೆದೆಗೆ ಉಸಿರಾಯಿತು.