ಭಾನುವಾರ, ಮೇ 18, 2014

ಬರೆದೆನೊಂದು ಪತ್ರವ ಗೆಳತಿ!!

ಅಸಂಖ್ಯ ಕವಿಗಳ ಹೃದಯದ ಭಾಷೆಯ
ಒಲವಿನ ಪದಗಳ ಸಾಲವ ಪಡೆದು;
ಅನಂತ ಹೃದಯಗಳುಲಿದಾ, ನಲಿದಾ
ಚೆಲುವಿನ ಮಾತುಗಳನೆರವಲು ಪಡೆದು;
ಮುಗಿಯದ ಕನಸುಗಳುಯ್ಯಾಲೆಯಲಿ
ತೂಗುವ ಮನಸಿನ ಪುಟಗಳ ಮೇಲೆ
ಬರೆದೆನೊಂದು ಪತ್ರವ ಗೆಳತಿ!

ಬಣ್ಣದ ಕನಸಿನ ಲೇಖನಿ ಹಿಡಿದು,
ಬಗೆ ಬಗೆ ಬಯಕೆಯ ಶಾಯಿಯ ಸುರಿದು,
ಹುಟ್ಟಿದ ಪದಗಳ ಮುತ್ತುಗಳನ್ನು
ನಿನ್ನಯ ಒಡಲಿಗೆ ಚೆಲ್ಲುವ ತವಕದಿ,
ಬರೆದೆನೊಂದು ಪತ್ರವ ಗೆಳತಿ!

ಉತ್ತರದ ನಿರೀಕ್ಷೆಯ ಗೋಪುರ ಕಟ್ಟಿ,
ಕಾತರದ ಚೆಲುವಿಗೆ ಮರುಳಾಗಿ,
ಕಲ್ಪನಾ ಲೋಕದ ನಿವಾಸಿಯಾಗಿ,
ಧ್ಯಾನಿಸಿ ಮನದ ಏಕಾಂತದೊಳು,
ಬರೆದೆನೊಂದು ಪತ್ರವ ಗೆಳತಿ;

ಕಾಣದೆ ಎಲ್ಲೋ ಕುಳಿತಿಹ ನಿನ್ನ,
 ತಲುಪಲಿ ನನ್ನೀ ಸಾಲುಗಳು;
ಬೀರಲು ಬಾಳಿಗೆ ಮಂದಾರವನ್ನ,
ಚಿಗುರಲಿ ಪ್ರೇಮ ಗುಲಾಬಿಗಳು;

ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ